راولپنڈی پولیس نے قمار بازی کے خلاف مؤثر کارروائیاں کرتے ہوئے مختلف علاقوں سے 11 افراد کو گرفتار کر لیا۔ کارروائیوں کے دوران مجموعی طور پر 35 ہزار 100 روپے نقدی، 6 موٹر سائیکلیں، 8 موبائل فون، مرغے اور تاش کے پتے برآمد کیے گئے۔
پولیس کے مطابق رتہ امرال تھانے کی پولیس نے کارروائی کرتے ہوئے 6 افراد کو حراست میں لیا جن کے قبضے سے 23 ہزار روپے نقدی، 3 موبائل فون اور تاش کے پتے برآمد ہوئے۔ اسی طرح تھانہ جاتلی پولیس نے کارروائی کرتے ہوئے 5 افراد کو گرفتار کیا جن کے قبضے سے 12 ہزار 100 روپے نقدی، 5 موبائل فون اور مرغے برآمد کیے گئے، جبکہ موقع سے 6 موٹر سائیکلیں بھی پولیس تحویل میں لے لی گئیں۔
پولیس نے بتایا کہ زیرِ حراست تمام افراد کے خلاف الگ الگ مقدمات درج کر کے مزید قانونی کارروائی کا آغاز کر دیا گیا ہے۔ پولیس حکام کا کہنا ہے کہ قمار بازی دیگر معاشرتی برائیوں کی جڑ ہے اور اس کے خاتمے کے لیے بلا امتیاز کارروائیاں جاری رکھی جائیں گی۔
