مری:
سیاحتی مقام مری میں افسوسناک ٹریفک حادثے کے نتیجے میں تین خواتین جاں بحق جبکہ تین افراد زخمی ہوگئے۔ حادثہ مری کے علاقے اوسیاہ ملکوٹ روڈ پر پیش آیا، جہاں بریک فیل ہونے کے باعث گاڑی کھائی میں جاگری۔
ریسکیو ذرائع کے مطابق حادثہ اس وقت پیش آیا جب مقامی افراد کی کار کے بریک اچانک فیل ہوگئے، جس کے باعث ڈرائیور گاڑی پر قابو نہ رکھ سکا اور گاڑی سڑک سے پھسل کر گہری کھائی میں جاگری۔ حادثے کے نتیجے میں تین خواتین موقع پر ہی جاں بحق ہوگئیں جبکہ تین دیگر افراد زخمی ہوگئے۔
اطلاع ملتے ہی امدادی ٹیمیں فوری طور پر جائے وقوعہ پر پہنچ گئیں اور جاں بحق افراد کی لاشوں اور زخمیوں کو قریبی اسپتال منتقل کر دیا گیا۔ زخمیوں کو طبی امداد فراہم کی جا رہی ہے جبکہ بعض کی حالت تشویشناک بتائی جا رہی ہے۔
پولیس نے واقعے کی تحقیقات شروع کر دی ہیں اور ابتدائی شواہد کی روشنی میں حادثے کی وجوہات کا تعین کیا جا رہا ہے۔ حکام نے شہریوں کو پہاڑی علاقوں میں سفر کے دوران گاڑیوں کی مکمل فٹنس اور بریک سسٹم کی جانچ یقینی بنانے کی ہدایت کی ہے تاکہ ایسے افسوسناک واقعات سے بچا جا سکے۔
